رواية جارتي كاملة أحداث شيقة ومثيرة

 انا بمجرد ماشوفتها جسمي اتلبش وقولت أكيد في مصيبه جايه وراها!..والغريب انها كانت بتتكلم بإحترام مش طبيعي على غير العاده رغم ان طبيعتها مش كده خالص!..وقالتلي ان انا عندي حق أخاف منها بعد اللي حصل..وقربت من ودني وقالتلي هقولك سر بس متقوليش لحد!..قولتلها قولي.. قالتلي انا اللي قتلت الشيخ.. 

بصيت في وشها لقيته متغير..دي مش ملامحها!.. دي ملامح الشيخ وهو مقتول!..رجعت بضهري وفضلت أصرخ بقوه لحد ما كل اللي حواليا قربوا مني وسندوني وانا لسه بصوت.. قولتلهم ان جارتي قدامي!.. كلهم قالوا مفيش حد طلع!..

وجوزي صمم انه ياخدني لـ دكتور نفسي في اعتقاده ان انا بقيت مريضه نفسيًا!.. ولكن رفضت وقولتلهم محتاجه ارتاح!..وبعد مانقلنا نص الشقه في العربيه وروحت الشقه الجديده اللي كانت في بلد تانيه..أول ماركبوا السرير روحت نايمه عليه..

عيني قفلت 5 دقايق شوفتني وانا في مكان كبير ضلمه كحل!..وفي كلاب سوده بتقرب مني وعاملين حواليا دايره كبيره!..كل ماالف الاقيهم حواليا مش سايبنلي أي مخرج!.. لحد ماجه الدجال من وراهم وفي ايده صليب وكان مبتسملي!وبيقولي اجهزي علشان أمك هتكون في ذمة الله وشاورلي بـ ايده وعمل 5!..صحيت مخضوضه وحاطه ايدي على قلبي..

 فضلت أقول بسم الله واقرأ قرآن!..انهارت وصعبت عليا نفسي من كل اللي بيحصلي..وبعد مرور اسبوع من الأحلام المزعجه والخيالات اللي بشوفها طلبت من جوزي اننا نشوف شيخ وبالفعل روحنا!..وكان طول القعده الشيخ موراهوش غير جميله واحده(لا اله الا الله)..

 قلقنا من كتر ما قالها وسألناه في ايه؟..قالي آخرك لحد بكرا بالليل وهتموتي!.. جاتلي صدمه وبصيت لـ جوزى بخوف! ولما سأله انت عرفت منين!.. قاله دي شغلتي ودي حاجه متخصكش..مراتك لبسها شيطان.. أعوذ بالله من الشيطان الرجيم..بدأت أصرخ.. وكل ما يقرأ قرآن أصوت اكتر!..

لحد ما ربطوني وكنت منهاره ومحدش قادر عليا!.. كنت أقوى منهم كلهم!.. كان فيا قوه تحرك جبل!..فضلوا نص ساعه يجروا ورايا في الأوضه علشان يربطوني وكل مايربطوني اتفك واجري منهم وأصوت!..ووقتها البلد كلها سمعتني!..